Beðið er eftir trúlofunartilkynningu Harry Bretaprins og Meghan Markle. Veðmangarar beina nú sjónum sínum að kærustuparinu.
Talið er að tilkynnt verði um trúlofun á næstunni eftir að veðmangarar hættu að veðja á annað konunglegt brúðkaup. Ástæðan er sú að talið er að tilkynnt verði um trúlofun á næstu dögum og það sé búið að gera ráð fyrir henni á dagskrá BBC. Virðast veðmangarar vita eitthvað meira en almenningur og taka því enga áhættu þar sem tilkynningar er að vænta.
Fulltrúi veðmálafyrirtækisins Ladbrokers sagði í viðtali við Daily Mail að áhugafólk um konungsfjölskylduna elskaði jólatrúlofun og að fyrirtækið byggist við henni á næstunni.
Skötuhjúin eru búin að vera saman í tæpt eitt og hálft ár og voru saman á opinberum viðburði í Kanada í haust. Markle er sögð flutt til Lundúna eftir að íbúð hennar í Toronto var tæmd á dögunum.