Landsmenn hafa slegið heimsmet í áhorfi á The Voice. Það er mat höfundarréttarhafans að þessari einni af vinsælustu hæfileikaþáttaröðum heims.
„Við erum mjög stolt af þeim glæsilega árangri sem The Voice hefur náð á Íslandi,“ segir Jelmar Hagen, leyfisstjóri sýningarréttarins að þættinum hjá Talpa Global B.V. Hann segir að hvergi í heiminum hafi markaðshlutdeild þáttarins verið meiri í sjónvarpi, en 61% sjónvarpsáhorfenda undir fimmtugu valdi þáttinn umfram annað efni síðasta föstudagskvöld. Alls 35% þjóðarinnar á aldrinum 12-80 ára stilltu á þáttinn í styttri eða lengri tíma.
„Heimsmet í hlutfalli. Það er náttúrlega afar íslenskt og frábær tilfinning,“ segir Pálmi Guðmundsson, forstöðumaður ljósvakamiðla hjá Símanum.
Þórhallur Gunnarsson, framkvæmdastjóri sjónvarps- og kvikmyndaframleiðslu Sagafilm, er í skýjunum yfir viðtökunum. „Við lögðum mikið á okkur að finna góða söngvara í þáttinn og teljum að þeir séu ein helsta ástæða velgengninnar. Söngvararnir hafa alla burði til að auðga íslenska tónlist.“
Íslendingar voru ekki síður duglegir að tísta um þáttinn, en síðasti þáttur sló líka öll fyrri met sín á Twitter þar sem 1.586 færslur birtust um þáttinn, en fyrra met var 499 færslur.
Í kvöld fer í loftið annar þáttur beinu útsendinganna og næstsíðasti þáttur í Voice. Nú er sú breyting á að þjálfararnir eru aðeins álitsgefandi, hvaða þátttakendur komast í lokaþáttinn ræðst alfarið í símakosningu, valið liggur hjá þjóðinni.