Hlaupa aftur á bak upp fjall

Tíu hlauparar frá Þýskalandi og Sviss ætla á sunnudag að hlaupa í fyrsta langhlaupinu þar sem hlaupið er aftur á bak upp fjall. Alls er vegalengdin ellefu kílómetrar og verður hlaupið í svissnesku ölpunum. Keppnin er hluti af heimsmeistarakeppninni í afturábakhlaupi sem staðið hefur yfir síðan í júní en 42 keppendur koma frá fjórum löndum.

Svissneski hlauparinn Rene Hauser, sem tekur þátt í keppninni, viðurkennir að margir horfi skringilega á sig þegar hann er að æfa. "Sumir halda að ég sé eitthvað skrítinn, öðrum finnst þetta bara frábært. Flestir segjast samt ekki vilja reyna því þá myndu nágrannarnir þeirra halda að þeir væru eitthvað furðulegir. Meira að segja hundar og kettir horfa spyrjandi á okkur," segir hann og bætir við að það sé frábær þjálfun fyrir vöðvana að hlaupa afturábak.