Smyglar fíkniefnum á vegum tollvarða

Grunlaus farþegi, sem flaug til Tókýó í gær, er með kannabis sem metið er á 700 þúsund krónur í fórum sínum en fíkniefnahundur, sem verið er að þjálfa á Naritaflugvelli stóð sig ekki í stykkinu.

Tollvörður á flugvellinum setti 142 grömm af kannabis í hliðarvasa á svartri ferðatösku, sem hafði komið með flugvél erlendis frá og valin var af handahófi á farangursvagni. Fíkniefnahundurinn var síðan látinn þefa af töskunum og leita að fíkniefnum.

Talsmaður japönsku tollgæslunnar segir að tilraunin hafi mistekist því hundurinn fann ekki kannabisefnið og tollvörðurinn gat ekki munað í hvaða tösku hann setti efnið.

„Ef farþegi finna það í töskunni sinni biðjum við hann um að skila því," sagði talsmaðurinn.  Hann hafði eftir tollverðinum, að hann gerði sér grein fyrir því að það væri bannað að nota töskur farþega í þessu skyni en hann hefði talið þetta góða aðferð til að þjálfa hundinn.

Tollvörðurinn var áminntur. Þá hefur yfirmaður tollgæslunnar á Naritaflugvelli beðist opinberlega afsökunar.

Hörð viðurlög liggja í Japan við því að vera með kannabis í fórum sínum.   

• 2 blogg um fréttina

Bloggað um fréttina

• Sigurður Hreiðar: stóð ekki í stykkinu - og stóð sig ekki heldur!
• Jón Finnbogason: Gleymdi í hvaða tösku hann setti efnið