Norska lögreglan til bjargar

Lögreglan í Bergen í Noregi varð um helgina að losa 18 ára gamla konu við handjárn sem höfðu verið notuð í ástarleikjum hennar og 22 ára karlmanns. Hálftíma tók að opna lásinn, að sögn Aftenposten.

Stúlkan var gestur á heimili 22 ára karlmanns sem hafði boðið hóp fólks heim til sín. Svo fór að hún hafnaði í svefnherbergi gestgjafans. En þegar þau vildu snúa aftur í samkvæmið að loknum ástarleiknum og losa hana við handjárnin fannst lykillinn hvergi.

„Við reyndum að nota sápu en það gekk ekki. Þegar hún hafi legið þarna í sex klukkustundir neyddumst við til að hringja í lögregluna. Þeim fannst þetta fyndið,“ sagði gestgjafinn en bætti við að þetta hefði hins vegar verið mjög vandræðalegt fyrir stúlkuna.