Skólastúlka seldi blíðu sína um helgar

Komið hefur í ljós að 15 ára gömul bresk skólastúlka þénaði alls um 14.000 pund, sem nemur um 2,2 milljónum kr., fyrir að selja blíðu sína um helgar. Þetta gerði hún um tveggja mánaða skeið.

Kennari stúlkunnar, sem býr í South Shield sem er skammt frá Newcastle, komst að þessu þegar hann fann smokka, sleipiefni og upplýsingar um vændishús, sem hún vann fyrir, í skólatöskunni hennar.

Lögreglan framkvæmdi húsleit heima hjá stúlkunni og fann um 8.000 pund, sem voru falin uppi á háalofti. Þetta gerðist í nóvember en þetta kom fram þegar dómstóll í South Tyneside ræddi það hvað ætti að gera við peningana. Það var loks ákveðið að afhenda yfirvöldum féð.

Talið er að stúlkan hafi þénað um 1.700 pund um hverja helgi.

Lögreglan segir að 44 ára gamall karlmaður og 46 ára gömul kona hafi verið handtekin. Þau eru grunuð um að láta börn stunda vændi. Þeim hefur verið sleppt.

Unglingsstúlkan verður hins vegar ekki ákærð í tengslum við málið.

• 1 blogg um fréttina

Bloggað um fréttina

• Rúnar Þór Þórarinsson: Tóku yfirvöldin féð OG var kennarinn að gramsa í skólatöskunni?