Fékk maríjúana á McDonalds

McDonalds
McDonalds mbl.is/Sverrir
Átján ára bandarískum pilti sem pantað hafði kjúklingaborgara í bílalúgu McDonalds í borginni Charleston í Suður Karólínu brá heldur betur í brún þegar hann fékk matinn afhentan. Í bréfpokanum merktum skyndibitakeðjunni voru tveir pokar af maríjúana og hlaðin skammbyssa.

Pilturinn ók af stað frá skyndibitastaðnum en tók fljótt eftir því að honum var veitt eftirför. Þegar pilturinn kom við á bensínstöð gekk til hans maður sem heimtaði byssuna og fíkniefnin. Skelkaður lét pilturinn manninn fá pokann og hélt sína leið. Daginn eftir sagði hann móður sinni söguna og hringdi hún umsvifalaust á lögregluna.

Lögreglan í borginni hefur að sögn fjölmiðla vestanhafs ekki handtekið neinn vegna málsins.
mbl.is