Hvar eru aðdáendur páfans?

Fjölmennt sjónvarpstökulið og fjölmiðlar um allt í miðborg spænsku borgarinnar Santiago de Compostela en hvergi sést til aðdáenda páfans. Þetta segja kaupmenn í nágrenni kirkjunnar þar sem Benedikt XVI páfi ætlar að syngja messu á morgun.

Kaupmenn eru afar vonsviknir og ekki síður hóteleigendur þar sem flest herbergi eru auð á hótelum í miðborginni. „Það er ekkert fólk komið hingað. Þetta kemur verulega á óvart," segir Marison, sem á ferðamannaverslun í nágrenni  dómkirkjunnar í Santiago, höfuðstaðs Galisíu-héraðs.

Í um þúsund ár hafa pílagrímar gengið til borgarinnar, þar sem heilagur Jakob er sagður vera jarðsettur en hann er talinn hafa breitt út boðskap Krists í þessum heimshluta.

Á miðöldum lágu allar leiðir til Santiago de Compostela. Borgin er talin vera ein af þremur helgustu borgum kristinna manna á eftir Jerúsalem og Róm. Á miðöldum, þegar mest var, kom árlega um hálf milljón manna fótgangandi til Santiago í þeirri von um að verða vitni að kraftaverki við gröf heilags Jakobs eða hljóta syndafyrirgefningu.

Talsmaður hótela í borginni segir að um 70-80% hótelherbergja í borginni séu pöntuð, langflest fyrir lögreglu og blaðamenn sem eru þar vegna komu páfa.

Eduardo Perez, sem stýrir pílagrímasetri borgarinnar segir að margir ferðamenn forðist borgina vegna komu páfa. Er það vegna þess að öryggisgæslan er gífurleg auk þess sem margir óttuðust örtröð og að öll hótel væru upppöntuð eða á uppsprengdu verði.

Dómkirkjan í Santiago de Compostela Reuters

• 1 blogg um fréttina

Bloggað um fréttina

• Jón Arnar: 1500 samkynhneigð pör munu kyssast honum til heiðurs/andófs