Brotist inn hjá löggunni

Brotist var inn í byggingu sem hýsir bæði Interpol og sérsveit Suður-afrísku lögreglunnar í Pretoria um helgina. Er þetta í annað skiptið hið minnsta á þremur vikum sem þar er brotist inn.

Talið er að þjófarnir hafi verið tveir eða þrír og stálum þeir meðal annars fartölvum frá sérsveit lögreglunnar. Að sögn talsmanns lögreglunnar var það sérsveitin sem varð fyrir barðinu á þjófum í þetta skiptið ekki Interpol líkt og síðast.

Hann telur að þjófarnir hafi ekki stolið tölvunum til að nálgast upplýsingar sem þar er að finna heldur miklu frekar til að koma sjálfum tölvunum í verð.

Síðast þegar brotist var inn var stolið tölvum og öðrum búnaði af skrifstofu Interpol. Þjófarnir komust inn með starfsmannakortum og höfðu greinilega aðgang að lykilorðum starfsmanna í húsinu. Þetta hefur vakið upp spurningar um öryggismál lögreglunnar í landinu.

• Blogga um frétt