Hægri öfl í Ísrael njóta aukins fylgis skv. nýrri skoðanakönnun

Helsti stjórnarandstöðuflokkurinn í Ísrael á hægri vængnum, Likud-bandalagið, hefur sótt í sig veðrið að undanförnu á sama tíma og mikillar óánægju gætir meðal Ísraela í garð ríkisstjórnar Ehuds Olmerts, forsætisráðherra landsins. Samkvæmt nýrri skoðanakönnun myndi Likud vera sigurvegari kosninga ef kosið væri nú.

Likud myndi fá 32 sæti á Ísraelsþinginu sem telur 120 sæti. Í dag er flokkurinn hinsvegar með 11 sæti. Þetta kemur fram í ísraelska dagblaðinu Yediot Aharonot.

Kadima-flokkur Olmerts myndi fá 18 þingsæti sem er talsvert fall frá þeim 29 sætum sem flokkurinn hefur núna. Helsti samstarfsflokkur Kadima í ríkisstjórn landsins, Verkamannaflokkurinn, myndi fá 12 sæti miðað við þau 20 sem hann hefur nú.

Fram kemur í könnuninni að Verkamannaflokknum, sem er helsti frjálslyndi flokkur landsins, myndi farnast betur ef hann myndi losa sig við leiðtoga sinn og hinn óvinsæla varnarmálaráðherra landsins, Amir Peretz.

• 1 blogg um fréttina

Bloggað um fréttina

• Snorri Bergz: Kadima-klúðrið