Mikill eldur í Novo Nordisk og breiðist út

Gríðarmikill eldur hefur brotist út í skrifstofubyggingu lyfjatæknirisans Novo Nordisk fyrir utan Kaupmannahöfn, í úthverfinu Bagsværd.

„Þetta er gífurlegur eldur. Við erum með um hundrað slökkviliðsmenn á vettvangi,“ segir aðgerðastjóri slökkviliðsins við AFP-fréttaveituna. Bætir hann við að byggingin hafi verið rýmd að fullu.

Fréttaveitan Ritzau segir eldinn hafa breiðst út í nærliggjandi byggingu og hefur eftir slökkviliðinu að hann sé enn að breiðast út í fleiri byggingar.

Umfangsmiklar aðgerðir slökkviliðs á vettvangi eldsins í Novo Nordisk í Bagsværd í dag. AFP

„Ekki gott“

„Þetta er ekki gott,“ hefur Ritzau eftir aðgerðastjóra slökkviliðs.

Ekki er vika liðin síðan eldur braust út á öðru starfssvæði Novo Nordisk, sem er í byggingu, en sá bruni hafði engin áhrif á lyfjaframleiðslu fyrirtækisins.

Í yfirlýsingu frá fyrirtækinu segir að nokkra klukkutíma muni taka að ráða niðurlögum eldsvoðans. Þar segir einnig að enginn hafi slasast.

Slökkviliðsmenn að störfum við skrifstofubyggingu Novo Nordisk, þar sem eldur braust út í morgun. AFP

Eldurinn hefur breiðst út í nærliggjandi byggingu. AFP

Mikinn reyk leggur frá eldinum

Lögregla tekur fram í tilkynningu að mikinn reyk leggi frá eldinum, sem byrgi ökumönnum sýn á Hillerød-hraðbrautinni.

Mælst er til þess að íbúar haldi sig inni og loki dyrum og gluggum, finni þeir fyrir reyk í umhverfi sínu.

Novo Nordisk getur þess í yfirlýsingunni að reykurinn sé ekki eitraður af lyfjaframleiðslu.

Uppfært:

Frétt af mbl.is

Hafa náð tökum á eldinum

• Blogga um frétt