Fallið frá nauðgunarákæru á hendur forseta Ísraels

Fallið hefur verið frá hugsanlegri ákæru fyrir nauðgun á hendur Moshe Katsav, forseta Ísraels en hann gerði samkomulag við ríkissaksóknara landsins. Samkvæmt samkomulaginu viðurkennir Katsav að hann hafi sýnt konum kynferðislega áreitni og brotið gegn þeim á ýmsan hátt. Þessi niðurstaða þýðir, að Katsaf sleppur með skilorðsbundinn dóm.

Menachem Mazuz, ríkissaksóknari Ísraels, kynnti samkomulagið í dag en það hefur verið gagnrýnt harðlega af fjölmiðlum og lögmönnum kvennanna, sem kærðu athæfi forsetans.

Katsav viðurkenndi einnig að hafa áreitt vitni í málinu, samþykkti að greiða jafnvirði 7 milljóna króna í bætur og hann mun einnig segja af sér embætti.

Katsav var upphaflega sakaður um að hafa nauðgað konu, sem starfaði í ferðamálaráðuneyti Ísraels þegar forsetinn var ferðamálaráðherra. Í kjölfarið komu fleiri konur fram með ásakanir á hendur Katsav.

Fyrir liggur, að Shimon Peres mun taka við forsetaembætti Ísraels um miðjan júlí.

• 2 blogg um fréttina

Bloggað um fréttina

• Jenný Anna Baldursdóttir: FALLIÐ FRÁ ÁKÆRU
• Mummi Guð: Vægir dómar á Íslandi.