Bush ætlar að heimsækja Minneapolis

George W. Bush Bandaríkjaforseti hyggst heimsækja Minneapolis og skoða aðstæður þar sem brú hrundi yfir ána Mississippi í gærkvöldi. Frá þessu greindu talsmenn Hvíta hússins í dag.

Kafarar hafa í dag leitað að fólki sem féll í ána þar sem brúin hrundi. Að sögn yfirvalda er búist við því að björgunaraðgerðir muni taka langan tíma þar sem aðstæður séu mjög erfiðar og hættulegar. Þetta er versta brúarslys í Bandaríkjunum í 20 ár.

Kafararnir á vettvangi sjá mjög takmarkað þar sem þeir leita í og við brúarrústirnar. Þeir hafa þó fundið nokkur af þeim ökutækjum sem féllu ofan í ána þegar brúin, sem er 40 ára gömul, gaf sig á háannatíma í gærkvöldi.

Slökkviliðsstjórinn Jim Clack segir að það séu yfir 10 ökutæki í ánni. Hann gaf þó ekki upp hvort fólk væri fast í bifreiðunum eður ei.

Staðfest er að fjórir hafi látist en fastlega er búist við að tala látinna muni hækka. Ekki er vitað hvers vegna brúarhlutinn, sem var 150 metrar á lengd, gaf sig.

Þingmaður demókrata í Minnesota, Amy Klobuchar, sagði í dag að: „Brú í Bandaríkjunum á ekki ekki bara að hrynja með þessum hætti.“

Yfir 50 ökutæki fóru í ána eða féllu á brúarrústirnar á hraðbraut 35W þegar brúin liðaðist í sundur öllum að óvörum. Yfir 60 manns slösuðust. Margir hlutu beinbrot auk áverka á höfði og mænu.

• 1 blogg um fréttina

Bloggað um fréttina

• Róbert Björnsson: Blessaður öðlingurinn