Erlent | AFP | 2.10.2007 | 10:58

Kínverjar banna reykingar í leigubílum

Mikið hefur verið gert til að gera Beijing vistlegri fyrir Ólympíuleikana á næsta ári. Hér er unnið að því að þrífa veggi Bankaútibús. AP

Yfirvöld í Beijing, höfuðborg Kína hafa ákveðið að banna reykingar í leigubílum borgarinnar, en ákvörðunin er hluti af aðgerðum stjórnvalda til að gera heimsókn gesta á Ólympíuleikanna á næsta ári ánægjulegri. Leigubílsstjórar verða sektaðir um allt að andvirði 1.500 króna ef upp kemst að þeir reyki í bílum sínum, auk þess sem nöfn farþega sem reykja í leigubílum verða „birt í fjölmiðlum”.

Skiltum hefur verið komið fyrir í flestum leigubílum, en ætlunin mun vera að taka hart á brotum á reykingabanninu, slíkt gæti þó reynst erfitt þar sem um helmingur kínverskra karla reykir.

Beijing er alræmd fyrir mengun, Kínverjar hafa gripið til fjölda aðgerða til að taka til í borginni fyrir Ólympíuleikana, mengandi og illa þefjandi verksmiðjum í borginni hefur verið lokað, fjöldi bíla takmarkaður í borginni. Mannasiðaherferðum hefur einnig verið hrint af stað þar sem borgarbúar eru hvattir til að ryðjast ekki fram fyrir í röðum, hætta að hrækja á götum úti, henda rusli og aka ógætilega, a.m.k. meðan á Ólympíuleikunum stendur.

Þá er nú unnið að því að fara yfir matseðla og skilti, til að reyna að útrýma kínverskuskotinni ensku, Chinglish, sem fæstir enskumælandi skilja svo vel sé.