Hvíta húsið: Kastróbréfið „athyglisvert“

Bandaríkjastjórn segir bréf Fídels Kastrós, sem lesið var upp í kúbverska ríkissjónvarpinu í gær, vera athyglisvert. Í bréfinu gefur Kastró í skyn að hann muni láta af embætti og setjast í helgan stein. Bandaríkjastjórn segir hinsvegar að erfitt sé að ráða í það hvað Kastró hafi í raun átt við.

Í bréfinu sagði Kastró, sem hefur átt við veikindi að stríða, að það væri ekki í hans verkahring að sitja sem fastast á valdastóli og koma í veg fyrir að sér yngra fólk komist til valda.

Þetta var í fyrsta sinn sem hinn 81s árs gamli Kastró hefur talað um að hann muni mögulega setjast í helgan stein.

„Þetta var athyglisvert bréf,“ sagði Dana Perino, talsmaður Hvíta hússins. „Það er erfitt að átta sig á því hvað hann er að segja eða hvað það þýðir, það er hinsvegar ekki óvenjulegt,“ hefur Reuters-fréttastofan eftir Perino.

„Við höldum áfram að vinna að þróun lýðræðis á eyjunni og við trúum því að sá dagur muni brátt koma,“ sagði Perino jafnframt.

Í október sagði George W. Bush Bandaríkjaforseti í ræðu að ríkisstjórn Kastrós væri til skammar og að endalokum komin. Þá hvatti hann íbúa Kúbu til þess að krefjast þess að lýðræðislegir stjórnarhættir yrðu teknir upp.

• 2 blogg um fréttina

Bloggað um fréttina

• Jóhannes Ragnarsson: Skilningleysi hlandaula
• Linda litla: Kastró ætlar ad setjast í helgan stein.