Fjörutíu og fimm ára gamall Pólverji var ákærður í gær fyrir að ræna unglingsdóttur sinni, loka hana inni í sex ár og nauðga henni.  Á tímabilinu hefur hún eignast tvö börn sem voru gefin til ættleiðingar.

Ekki er búið að gefa upp nafn mannsins en hann var handtekinn í borginni Siedlce í Mið-Póllandi er hann reyndi að flýja.

Dóttir hans er nú 21 árs gömul og tilkynnti hún um afbrotin í síðustu viku, að sögn talsmanns pólsku lögreglunnar.

Unga konan gaf sig fram við lögregluna í Siemiatycze í austurhluta Póllands ásamt móður sinni. Bar hún vitni um það að hafa verið lokuð inni af föður sínum og síðan nauðgað frá því að hún var fjórtán ára gömul.

Hún hefur fætt tvö börn, árið 2005 og 2007, og voru þau skilin eftir á spítala til ættleiðingar.

Þau eru líklega afleiðing nauðgana, að sögn talsmannsins.

Stúlkan heldur því fram að faðir hennar hafi fylgt henni á spítalann og síðan þvingað hana til að gefa börnin frá sér.

Lögreglumaður sem rannsakar málið segir stúlkuna hafa lifað í helvíti. Henni hafi verið nauðgað, hún bundin og ógnað með hnífi.

Maðurinn getur verið í haldi í þrjá mánuði áður en hann er ákærður og á yfir höfði sér fimmtán ár í fangelsi.