Vegið að stöðu kvenna í Íran

Stjórnarfrumvarp um breytingar á hjúskaparlögum liggur nú fyrir íranska þinginu en í frumvarpinu er m.a kveðið á um að eiginmenn þurfi ekki lengur að fá samþykki fyrstu eiginkonu sinnar til að taka sér fleiri eiginkonur. Þetta kemur fram á fréttavef Jyllands-Posten.

Samkvæmt íslam mega múslímakarlar taka sér allt að fjórar eiginkonur að því tilskildu að þeir komi eins fram við þær allar. Í Íran og Sýrlandi hefur hins vegar verið kveðið á um það í landslögum að eiginmenn þurfi samþykki fyrstu eiginkonu sinnar til að taka sér fleiri konur.

Breytingatillögunni var hafnað í fyrstu atkvæðagreiðslu um frumvarpið á þinginu en nokkrir mánuðir eru í að endanleg breytingatillaga verði lögð fyrir þingið.

Fremur fátítt er að íranskir karlar eigi fleiri en eina eiginkonu en kvenna og mannréttindasamtök í landinu hafa gagnrýnt breytingatillöguna harðlega. Segja þau hana vega mjög að stöðu kvenna bæði innan samfélagsins og fjölskyldunnar, jafnvel þótt fremur sé um hugmyndafræði en framkvæmdaatriði að ræða.

• 2 blogg um fréttina

Bloggað um fréttina

• Bryndís Eva Vilhjálmsdóttir: VEGIÐ AÐ STÖÐU KVENNA Í ÍRAN.
• Snorri Bergz: Vegið að stöðu kvenna í Íran