Þá mætir fólk á þessa leiki

„Við byrjuðum illa og svo var sárt að missa Dani af velli,“ sagði Þorleifur Ólafsson þjálfari kvennaliðs Grindavíkur í samtali við mbl.is í kvöld. Grindavík mátti þola naumt tap, 83:79, á heimavelli gegn Njarðvík í fyrsta leik liðanna í undanúrslitum Íslandsmótsins í Smáranum.

Danielle Rodríguez var sjóðheit í fjórða leikhluta, þangað til hún fékk sína fimmtu villu. Njarðvík gekk á lagið eftir það og sneri leiknum sér í vil.

„Við ætluðum að vinna en það gekk ekki í dag. Það var vont að missa Dani út af en þá verða aðrir að stíga upp. Þetta er samt eini leikmaðurinn sem við megum alls ekki missa.“

Þorleifur Ólafsson mbl.is/Óttar Geirsson

Þrátt fyrir tap var Þorleifur sammála ofanrituðum að um skemmtilegan leik hafi verið að ræða í kvöld.

„Þetta er í fimmta skiptið sem við spilum við Njarðvík og þetta eru allt hörkuleikir. Ef fólk vill sjá alvöruleiki þá mætir það á þessa leiki,“ sagði Þorleifur.

• Blogga um frétt