Ríkisstjórn Sádi-Arabíu vinnur nú að nýjum reglum um lágmarksaldur til að ganga í hjónaband. Er þetta gert í þeim tilgangi að sporna við að ung börn gangi í það heilaga.

Bandar al-Aiban, formaður nefndar ríkisstjórnarinnar um mannréttindi, segir að þrátt fyrir að barnahjónavígslur sé fátíðar sé málið áhyggjuefni. Til umræðu er að hjónavígslualdur í landinu verði 16 til 18 ár samkvæmt nýju reglunum.

Sádi-Arabar hafa verið harðlega gagnrýndir fyrir að leyfa foreldrum að gifta ungar dætur sínar. Í fyrra varð uppi fótur og fit vegna manns sem gifti átta ára dóttur sína manni á sextugsaldri í skiptum fyrir heimanmund. Móðir stúlkunnar reyndi að fá hjónabandinu hnekkt en því var tvívegis hafnað fyrir dómstólum. Í apríl létu hjónin þó undan utanaðkomandi þrýstingi og skildu.

Aiban segir vandan liggja í því að sharíalög múslima, sem eru grundvöllur sádi-arabíska réttarkerfisins, kveði hvergi á um bann við að börn gangi í hjónaband. Nýjar reglur um þetta þurfi að móta í samræmi við megingildi sharíalaganna.