Dulbúnir aðgerðarsinnar mótmæla brotum á tjáningarfrelsi í Rússlandi. SHAMIL ZHUMATOV

Alls voru 76 blaðamenn drepnir vegna starfs síns á árinu 2009, 16 fleiri en í fyrra að sögn fjölmiðlasamtakanna Blaðamenn án landamæra.

„Stríð og kosningar hafa verið mesta ógnin við blaðamenn á árinu 2009," segir Jean-Francois Julliard, aðalritar samtakanna. „Ofbeldi sem framið er gegn blaðamönnum fyrir og eftir kosningar hefur verið sérstaklega áberandi þetta árið í löndum þar sem lýðræðið er veikt."

Mannránum á fjölmiðlafólki fjölgaði líka árið 2009 og voru alls 33, samanborið við 29 rán árið 2008. 1.456 blaðamenn urðu fyrir líkamsárásum eða hótunum, en árið 2008 voru þeir 929, og fleiri bloggarar urðu fyrir staðfestri ritskoðun (115 árið 2009 en 59 árið 2008).

Hefting tjáningarfrelsisins hefur aukist á internetinu því fjöldi landa þar sem ritskoðun hefur áhrif hefur tvöfaldast á milli ára, úr 37 löndum árið 2008 í 60 árið 2009. „Í hvert skipti sem internetið eða hvers kyns nýr miðill (s.s. farsímar og samskiptasíður) spila stórt hlutverk í að koma upplýsingum á framfæri þá eru afleiðingarnar alvarlegar," segir Julliard.

Hann bætir því við að árið 2009 hafi verið verulegt áhyggjuefni hversu mörgum blaðamönnum hafi verið vísað úr landi þar sem ástandið er viðkvæmt, í löndum eins og Íran og Sri Lanka.

„Yfirvöld í þessum löndum hafa augljóslega skilið að með því að senda blaðamenn burt hafa þeir dregið úr útbreiðslu upplýsinga og gagnrýni gegn þeim."