Evrópusambandið herti enn þumalskrúfurnar á Grikkjum í dag í því skyni að endurheimta traust markaðarins. Stjórnvöldum í Aþenu var gefinn aðeins 30 daga frestur til að snúa við bullandi halla á ríkisfjármálum og skuldasöfnun.
Svíar, sem standa utan evrusvæðisins, voru í fararbroddi á fundi fjármálaráðherra alla Evrópusambandslandanna í Brussel og sendu grískum stjórnvöldum viðvörun um að þau yrðu að standa sig „framar vonum“ fjárfesta ef þau ætluðu að bægja frá árásum markaðarins.
Evrulöndin 16 samþykktu í gær „aukaráðstafanir“ gagnvart Grikkjum fyrir 16. mars næstkomandi. Þær fólust m.a. í að auka skyldi niðurskurð kostnaðar og hækka skatta ef aðgerðir reynast ekki fullnægjandi. Þessar ráðstafanir átti að samþykkja á fundinum í dag.
Anders Borg, fjármálaráðherra Svíþjóðar, sagði að grísk stjórnvöld þyrftu að ganga miklu lengra en þau hafa þegar gert ef þeim eigi að takast að ná markmiði frá því í fyrra um að skera niður halla um þriðjung.