Hrósa sigri yfir Japönum

Paul Watson, stofnandi Sea Shepherd samtakanna segir að sú ákvörðun Japana að yfirgefa hvalamiðin við Suðurskautslandið séu „frábærar fréttir“. Undanfarin sjö ár hafa samtökin elt Japana á veiðum þeirra á þessum slóðum.

Watson segir, að hyggist Japanar fara aftur á þessar slóðir til hvalveiða, muni samtökin gera allt til að stöðva veiðarnar.

 „Við verðum áfram hér á miðunum og eltum japönsku hvalveiðiskipin út af svæðinu, “sagði Watson í samtali við AFP fréttastofuna. „Ég treysti þeim ekki, en mun þó taka mark á orðum þeirra. Við skiljum ekki við þá, fyrr en en þau eru komin út af hvalveiðimiðunum.“

Nokkur átök hafa verið á milli Sea Shepherd og japönsku hvalveiðiskipanna. Samtökin hafa varpað fýlubombum á skipin, sem hafa svarað með því að sprauta vatni á skip umhverfissamtakanna.

Japanar aflýstu veiðunum á miðvikudaginn og sögðu að ástæðan væri áreitni af hendi Sea Shepherd. Endurskoðað verður að ári, hvort haldið verði aftur til veiða.