Efast um að Kim Jong-il hafi dáið í lestinni

Stjórnvöld í S-Kóreu efast um að frásögn um að Kim Jong-il, leiðtogi N-Kóreu, hafi dáið á ferðalagi í lest sé rétt. Samkvæmt gervihnattarmyndum hafi lestin verið kyrr í Pyongyang, höfuðborg landsins, á þeim tíma sem leiðtoginn á að hafa verið á ferðalagi í henni.

Samkvæmt opinberri tilkynningu um dauða Kim Jong-il lést hann úr ofþreytu í lest eftir að hafa verið á ferðalagi til að hitta þjóð sína. Tilkynnt var um andlát hans 51 klukkutíma eftir að hann lést. Þessi frásögn fellur vel að þeirri mynd sem reynt hefur verið að draga upp af leiðtoganum.

Won Sei Hoon, upplýsingafulltrúi þings S-Kóreu, segir hins vegar að gervihnattarmyndir sýni að lestin hafi ekkert færst úr stað á þeim tíma sem Kim Jong-il á að hafa verið á ferðalagi með henni. Miklu líklegra sé að hann hafi látist heima hjá sér í höfuðborginni.

• 2 blogg um fréttina

Bloggað um fréttina

• G. Tómas Gunnarsson: Kommúnistar fyrr og nú
• Ómar Ragnarsson: Hitler "fell in command post".