Fraus til bana við að verja dóttur sína

Faðir fraus til bana um helgina eftir að hafa varið níu ára gamla dóttur sína í óveðri sem gekk yfir norðurhluta Japans. 

Fyrir tveimur árum missti stúlkan móður sína úr óþekktum sjúkdómi, að því er fram kemur í fréttum japanskra fjölmiðla.

Mikio Okada lést er hann reyndi að verja einkabarn sitt, Natsune, í aftakaveðri á Hokkaido eyju. Náði vindhraðinn rúmum 30 metrum á sekúndu í sex stiga frosti á þessum slóðum á laugardag. Níu létust í óveðrinu á eyjunni um helgina.

Natsune var vafin í jakka föður síns en hún fannst í örmum látins föður á sunnudag. Þá hafði ekkert spurst til þeirra síðan síðdegis á laugardag er Okada sótti dóttur sína í skólann. Okada hringdi í ættingja þegar hann var á heimleið en hann hafði fest bifreiðina í snjó skammt frá heimili sínu. Sagði hann að þau feðgin myndu ganga heim síðasta kílómetrann en þau fundust síðan í gær í einungis 300 metra fjarlægð frá bifreiðinni.

Okada hafði reynt að verja dóttur sína fyrir óveðrinu og slapp hún ótrúlega vel en ekkert amaði að henni þegar hún fannst.

• 1 blogg um fréttina

Bloggað um fréttina

• Kristin stjórnmálasamtök: Föðurást - og 'Móðurást' Jónasar Hallgrímssonar