Hóta að neyða ESB til samninga

„Evrópusambandið veit það mætavel að Færeyjar hafa ekki sagt sig frá samstarfi um síldina eða annan deilistofn á okkar svæði,“ segir í bréfi sem Jacob Vestergaard, sjávarútvegsráðherra Færeyja, sendi Mariu Damanaki, sjávarútvegsstjóra ESB, í gær vegna hótana sambandsins um refsiaðgerðir gegn Færeyingum vegna einhliða kvótaúthlutunar þeirra í norsk-íslenska síldarstofninn.

Haft er eftir Vestergaard á fréttavefnum Worldfishing.net að færeysk stjórnvöld séu sem fyrr reiðubúin að semja um sjálfbærar veiðar í norsk-íslenska síldarstofninum sem og öðrum deilistofnum. Ráðherrann segist sannfærður um að enn sé mögulegt að ná slíkum samningum. Hann hafi því hvatt ESB til þess að taka þátt í því að koma samningaviðræðum af stað á nýjan leik.

Fram kom í bréfinu til Damanaki að ef ESB héldi fast við það að beita Færeyjar refsiaðgerðum áskildu þarlend stjórnvöld sér þann rétt að neyða sambandið til þess að setjast að samningaborðinu í samræmi við ákvæði alþjóðalaga og vísaði þar til Alþjóðahafréttarsáttmálans.

• 1 blogg um fréttina

Bloggað um fréttina

• Eggert Guðmundsson: Nú reynir á ESB.