Biden hvetur Ísraelsmenn til friðarsamninga

Joe Biden, varaforseti Bandaríkjanna, hvetur Ísraelsmenn til að grípa tækifærið og semja frið við Palestínumenn. Biden er nú staddur í Ísrael vegna útfarar Ariels Sharons, fyrrverandi forsætisráðherra Ísraels og átti vinnufund með Shimon Peres, forseta Ísraels.

„Eina svæðið í þessum heimshluta þar sem er tækifæri til friðar og stöðugleika er á milli Palestínumanna og Ísraelsmanna. Á milli tveggja ríkja sem virða fullveldi og öryggi hvors annars,“ sagði Biden.

Fulltrúar þjóðanna tveggja áttu friðarviðræður í júlí í fyrra fyrir tilstuðlan John Kerry, utanríkisráðherra Bandaríkjanna, og voru það fyrstu beinu viðræður þeirra í tæp þrjú ár. Fallist var á níu mánaða viðræðuáætlun, en hingað til hefur lítið áunnist.

Biden segir erfiðar ákvarðanir framundan, en lét í ljós fullvissu sína um að Benjamin Netanyahu, forsætisráðherra Ísraels, væri reiðubúinn til samninga og sagðist vonast til þess að það sama gilti um Mahmud Abbas, leiðtoga Palestínumanna.

• Blogga um frétt