Þota af gerðinni Boeing 777 frá bandaríska flugfélaginu United Airlines nauðlenti á Heathrow-flugvellinum í London nú síðdegis. Gekk lendingin að óskum.
Bandaríska sjónvarpsstöðin CNN skýrði frá lendingunni og ber fulltrúa flugvallaryfirvalda á Heathrow fyrir fréttinni.
Þotan var á leið frá San Francisco til London. Ekki hefur verið skýrt frá því hversu margir voru um borð eða hvers vegna nauðlenda þurfti þotunni.