Á Spáni er talað um Noreg sem paradís, segir spænsk kona sem flutti til Noregs í atvinnuleit. Noregur hefur helsti áfangastaður brottfluttra íslenskra ríkisborgara frá árnu 2008 en frá því ári og til ársloka 2013 hafa 7.337 Íslendingar flutt til Noregs.
Norska ríkisútvarpið fjallar um vinsældir Noregs meðal Spánverja og íbúa annarra Evrópulanda þar sem atvinnuleysi er mikið á vef sínum í dag. Þar er meðal annars rætt við Valentinu Stefanova, 54 ára, sem ákvað að flytja til Noregs þar sem það hlyti að vera auðveldara að fá vinnu í landi þar sem atvinnuleysið væri 3% en í landi þar sem atvinnuleysið væri 27%.
Hún ákvað því að yfirgefa Spán og leita fyrir sér í Noregi þar sem hún bjóst við að fá vinnu við umönnun eða á leikskóla. En þrátt fyrir að hafa sótt um 100 störf á þeim þremur mánuðum sem hún hefur dvalið í Noregi þá hefur hún einugis fengið íhlaupavinnu. Hún segist ekki trúa því að það sé aðeins 3% atvinnuleysi í Noregi þar sem henni sé alltaf synjað þar sem hún sæki um. En hún er ekki sú eina sem hefur upplifað höfnun á norskum vinnumarkaði, segir í frétt NRK.
Að sögn Tatiania Espinosa, 34 ára, er ekki dregin raunsæ mynd af Noregi í útlöndum. „á Spáni er talað um Noreg sem paradís og ef þú farir þangað sértu öruggur um að fá vinnu. Eins hversu há laun þú munir fá,“ segir Espinosa í viðtali við NRK.
Þeir innflytjendur sem NRK ræddi við sem koma frá Suður-Evrópu segja að Noregur sé ekki fyrirheitna landið líkt og þeir héldu áður en þeir komu þangað. Miklu erfiðara sé að fá vinnu en þeir bjuggust við auk þess sé svo miklu dýrara að lifa þar en í heimalandinu.
Zoulikha Bessehlie Hemia er ættuð frá Alsír en er spænskur ríkisborgari. Henni hefur gengið illa að fóta sig í Noregi og segir alls staðar gerða þá kröfu að umsækjendur tali norsku. „Þegar ég sæki um vinnu er mér sagt að ég verði að tala norsku en ég get ekki talað tungumálið eftir aðeins tvo mánuði í landinu. Hvers vegna þarf ég að tala norsku til að geta vaskað upp?“ spyr hún.