Þriggja sólarhringa vopnahlé hófst klukkan fimm í morgun á Gaza. Ísraelar héldu áfram loftárásum sínum í nótt, þá sérstaklega síðustu tvær klukkustundirnar áður en vopnahléið hófst.
Ísraelar og Palestínumenn munu funda í Kaíró í Egyptalandi á meðan það stendur yfir. Fjórtán Palestínumenn og fimm ísraelskir hermenn féllu í átökunum í nótt.
John Kerry, utanríkismálaráðherra Bandaríkjanna, sagði í gærkvöldi að vopnahléið væri nauðsynlegt almennum borgunum.
„Á meðan því varir fá almennir borgarar nauðsynlegt hlé til þess að grafa hina látnu, sjá um særða og byrgja sig upp af matvælum,“ sagði hann í stuttri yfirlýsingu frá Nýju-Delí í Indlandi. Þá sagði hann að nauðsynlegar viðgerðir á vatns- og rafmagnsveitum gætu einnig átt sér stað.