Tala látinna eftir að aurskriða féll í Hírósíma í Japan fyrir tæpri viku er nú komin upp í 63. Meðal þeirra sem saknað er eru hjón sem áttu von á fyrsta barni sínu í nóvember. Fjölskylda fólksins bíður og vonar það besta en ljóst er að vonin er afar veik eftir svo marga daga í leðjunni.
Hin 28 ára Minami Yuasa og eiginmaður hennar, Yasuhiro gengu í hjónaband í október á síðasta ári. Þau áttu von á frumburði sínum eftir tæpa þrjá mánuði. Þau bjuggu í fjölbýlishúsi en skriðan hreif húsið á brott. Mörg tonn af jarðvegi, steinum og trjám komu eins og þruma úr heiðskýru lofti niður fjallshlíð í Hírósíma og kaffærðu fólk, hús og bíla.
Foreldrar ungu konunnar sögðu í samtali við fjölmiðla að þau biðu eftir kraftaverki.
Meðal látinna er einnig 53 ára gamall björgunarmaður sem var að störfum á hamfarasvæðinu er önnur aurskriða féll. Honum tókst að bjarga fimm manns úr leðjunni og koma þeim í öruggt skjól áður en hann varð undir skriðunni sem kostaði hann lífið, samkvæmt upplýsingum frá almannavörnum í Japan.