Erlent | mbl | 15.9.2014 | 5:56 | Uppfært 3.12.2014 7:25

Ekki í stjórn með SD

Stefan Löfven, formaður Jafnaðarmannaflokks Svíþjóðar, ætlar að hefja stjórnarmyndunarviðræður í dag en flokkur hans fór með sigur af hólmi í sænsku þingkosningunum í gær. Fékk flokkurinn 31,2% atkvæða. Löfven, sem tók við formannssæti flokksins árið 2012, segir að ekki komi til greina að mynda ríkisstjórn með öfgaflokknum Svíþjóðardemókrötum (SD) en flokkurinn fékk 12,9% atkvæða og er þriðji stærsti flokkur landsins.

Frederik Reinfeldt, formaður Hægri flokksins og forsætisráðherra, tilkynnti stuðningsmönnum sínum í nótt að hann myndi óska eftir afsögn ríkisstjórnar sinnar í dag og eins myndi hann láta af starfi formanns flokksins. Hægri flokkurinn fékk 23,2% atkvæða í gær.

Fylgi rauðgrænu flokkanna – Jafnaðarmannaflokksins, Græna flokksins og Vinstriflokksins er 43,7 prósentustig en borgaraflokkarnir: Hægriflokkurinn (Moderatarna), Frjálslyndi flokkurinn, Miðflokkurinn og Kristilegir demókratar fengu 39,3% atkvæða.

Jafnaðarmannaflokkurinn var eitt sinn einn af öflugustu stjórnmálaflokkum Evrópu og var við völd í 65 ár af 78 á árunum 1932 til 2010. Flokkurinn fékk 30,7% atkvæða í síðustu kosningum og það var minnsta fylgi hans í þingkosningum frá árinu 1920, segir í grein sem Bogi Þór Arason ritaði í Morgunblaðið á fimmtudaginn um sænsk stjórnmál.

Sigur borgaralegu flokkanna í kosningunum fyrir fjórum árum markaði tímamót í sænskum stjórnmálum. Það var í fyrsta skipti í tæp 80 ár sem stjórn borgaralegra flokka í Svíþjóð hélt velli eftir að hafa setið eitt kjörtímabil.

Málefni hælisleitenda hafa verið á meðal helstu deilumálanna í kosningabaráttunni í Svíþjóð vegna metfjölda hælisleitenda í ár. Svíþjóð veitti fleiri flóttamönnum hæli miðað við höfðatölu en nokkurt annað Evrópuland á síðasta ári og búist er við að alls verði hælisleitendurnir um það bil 80.000 í ár.

Umsóknir 24.015 hælisleitenda voru samþykktar í Svíþjóð á síðasta ári en 20.990 umsóknum var synjað. 53% umsóknanna voru samþykkt, en í löndum Evrópusambandsins var hlutfallið 34% að meðaltali. Flestir hælisleitendanna voru Sýrlendingar, fólk án ríkisfangs eða Erítreumenn.

Alls sóttu 435.000 manns um hæli í ESB-löndunum á síðasta ári, þar af 29% í Þýskalandi, 15% í Frakklandi, 13% í Svíþjóð, 7% í Bretlandi og 6% á Ítalíu.

Svíþjóðardemókratarnir eru flokkur þjóðernissinna, stofnaður árið 1988. Jimmie Åkeson hefur verið talsmaður hans frá árinu 2005. Flokkurinn á rætur að rekja til þjóðernissinnaðra hreyfinga sem voru sakaðar um nýnasisma og kynþáttafordóma. Catharine Strandquist, forystumaður flokksins í Halmstad, sagði af sér nýlega eftir að birtar voru myndir af henni með armbindi nasista.

DN.se