Ríkisstjórnarflokkarnir í Noregi mælast í dag með nánast sama fylgi og þeir fengu í þingkosningunum fyrir nákvæmlega ári síðan. Fylgi féll örlítið á árinu en hefur nú aukist aftur. Flokkarnir leggja fram annað fjárlagafrumvarp sitt nú í byrjun október.
Hægriflokkurinn (Høyre) og Framfaraflokkurinn (FrP) settust í ríkisstjórn eftir kosningarnar í fyrra, með stuðningi Kristilegra demókrata og Vinstriflokksins. „Það voru margir svokallaðir sérfræðingar sem spáðu því að FrP myndi missa fylgi um leið og við settumst í ríkisstjórn. Við vinnum nú að því að innleiða okkar stefnumál á hverjum einasta degi og kjósendur taka eftir því,“ segir Siv Jensen, fjármálaráðherra og formaður FrP í samtali við Aftenposten.
Skoðanakönnunin sem gerð var fyrir Aftenposten og Bergens Tidende, sýnir að Hægriflokkurinn er með 26,4% og FrP með 15,8%. Verkamannaflokkurinn er sem fyrr stærstur með 34,2%, örlítið minna en hann hlaut í kosningunum í fyrra. Todal Jenssen, stjórnmálafræðingur segir í Aftenposten að honum þyki niðurstöðurnar benda til þess að stjórnarandstaðan hafi legið í dvala á árinu. „Þetta sýnir að stjórnarandstaðan hefur ekki tekist að finna umdeild mál sem vekja athygli kjósenda,“ segir Todal.
Sjá frétt Aftenposten