Skotinn til bana fyrir slysni

Óvopnaður 28 ára gamall maður var skotinn til bana af lögreglu í New York borg í gærkvöldi.

Lögreglustjórinn Bill Bratton sagði í dag að lögreglumaðurinn sem skaut hafi verið nýr og að þetta hafi verið „algjört slys“.

Maðurinn sem lést hét Akai Gurley og var nýkominn inn í stigagang íbúðarhúss með kærustu sinni er hann var skotinn einu sinni í bringuna af lögreglumanninum. Það var klukkan 11:15 í gærkvöldi. Farið var með hann á sjúkrahús þar sem hann lést. 

Bratton sagði frá því í dag að fórnarlambið hafi verið saklaus og tengdist ekki glæpum á neinn hátt. 

„Það sem gerðist í gærkvöldi var óheppilegur harmleikur,“ sagði Britton í samtali við fjölmiðla. Sagði hann jafnframt að málið væri í skoðun hjá saksóknara Brooklyn umdæmis og lögreglunnar í New York. 

„Það lítur út fyrir að skotið hafi verið að slysni,“ bætti hann við. 

Gurley var skotinn er tveir ungir lögreglumenn voru við hefðbundna skoðun í húsinu, en það hefur oft verið vettvangur glæpa og morða.

Ljósin voru biluð á stigagangi hússins á sjöundu og áttundu hæð sem gerði það að verkum lögreglumennirnir sáu illa. Þó voru þeir báðir með vasaljós. 

Eftir að maðurinn var skotinn fundu lögreglumennirnir hann á fimmtu hæð þar sem kærasta hans hlúði að honum. Parið ætlaði upphaflega að taka lyftuna niður en ákváðu að nota stigann þar sem lyftan var of lengi að koma. 

• 2 blogg um fréttina

Bloggað um fréttina

• Ásgrímur Hartmannsson: Einungis sérþjálfuðum lögreglumönnum er treystandi
• Jens Guð: Byssan er saklaus