Byssumenn sem myrtu 28 manns um borð í rútu í Kenía í gær vilja hefja trúarbragðastríð. Þetta segir Abdikadir Mohammed sem er náinn ráðgjafi forseta landsins, Uhuru Keyatta.
Mohammed segir í samtali við breska ríkisútvarpið að hann hafi hvatt alla íbúa Kenía, óháð trú, til að standa saman gegn svívirðilegum glæpum.
Liðsmenn al-Shabab réðust á rútuna í dögun í gærmorgun í norðurhluta Kenía. Þar skutu þeir farþega til bana sem voru ekki múslímar.
Samtökin, sem hafa aðsetur í Sómalíu, hafa staðið á bak við fjölmargar árásir í Kenía undanfarin þrjú ár.
Rútan var að aka til Naíróbí, höfuðborgar landsins, þegar hún var stöðvuð í Mandera-sýslu, sem er skammt frá landamærunum að Sómalíu.
Byssumennirnir aðskildu múslimana frá öðrum með því að biðja farþegana að lesa upp úr kóraninum. Þeir sem gátu það ekki voru skotnir í höfuðið.
Rauði krossinn í Kenía segir að 28 farþegar af 60 hafi látist. 19 karlar og níu konur.