Yfir hundrað manns var slátrað í Austur-Kongó í síðustu viku. Voðaverkið var framið í austurhluta landsins þar sem stöðug átök hafa geisað síðustu misseri.
Talið er að fjöldamorðið hafi verið framið á fimmtudag í námunda við bæinn Beni í Norður-Kivu-héraði. Þar hafa íslamskir uppreisnarmenn frá Úganda komið sér fyrir og eru þeir taldir bera ábyrgð á morðum á 200 óbreyttum borgurum frá því í október.
Talsmaður stjórnarandstöðunnar í þinginu segir að 95 lík hafi fundist í fjöldagröf og níu til viðbótar verið send í líkhúsið. Hann segir að varað sé við því að fara inn í frumskóginn á svæðinu því þar sé talið að fleiri lík sé að finna.