Rúmlega tvítug húshjálp í Úganda hefur verið dæmd í fjögurra ára fangelsi fyrir að hafa beitt barn sem hún gætti ofbeldi. Myndskeið sem sýnir hana ganga í skrokk á barninu hefur vakið mikinn óhug meðal almennings í Úganda.
Jolly Tumuhiirwe, 22 ára, játaði í síðustu viku að hafa gerst sek um pyntingar en ákærunni var síðar breytt í misþyrmingar. Dómarinn segir að Tumuhiirwe hafi gerst sek um óafsakanlegan glæp sem ekki sé hægt að réttlæta á nokkurn hátt.
Upp komst um meðferð hennar á barninu eftir að foreldrar stúlkunnar, sem er 18 mánaða gömul, settu upp eftirlitsmyndavélar á heimilinu. Meðal annars sást húshjálpin henda stúlkunni í gólfið, sparka í andlit hennar og kvið áður en hún steig ofan á barnið af öllum þunga. Á myndskeiði sést hún síðan draga barnið meðvitundarlaust út úr herberginu.