Erlent | mbl | 21.1.2015 | 21:53

Hættir vegna Hitlers-skeggsins

Lutz Bachmann, fyrrverandi leiðtogi Pegida, og Kathrin Oertel, talsmaður hreyfingarinnar. AFP

Stofnandi þýsku hreyfingarinnar Pegida sem beint er gegn múslimum í Evrópu hætti sem leiðtogi hennar í dag eftir að athygli var beint að mynd af honum með hárgreiðslu skegg í anda nasistaforingjans Adolfs Hitler auk rasískra ummæla sem hann birti á Facebook.

Fram kemur í frétt AFP að leiðtoginn fyrrverandi, Lutz Bachmann, hafi beðið stuðningsmenn sína afsökunar á Facebook á „hugsunarlausum yfirlýsingum sem hann myndi ekki láta frá sér fara í dag. Mér þykir leitt að hafa skaðað hagsmuni hreyfingarinnar okkar með þeim og þess vegna axla ég ábyrgð á þeim.“

Myndin af Bachmann vakti mikla reiði á samfélagsmiðlum. Ummæli hans voru meðal annars á þá leið að flóttamenn voru kallaðir skepnur og óþverri. Saksóknari í þýsku borginni Dresden hefur til skoðunar að ákæra Bachmann fyrir hatursáróður.

Haft er eftir talsmanni Pegida, Kathrin Oertel, að myndin af Bachmann hafi verið háðsádeila sem allir ættu rétt á að grípa til. En hún hafi gengið of langt. Hann hafi sett myndina á netið í september, nokkrum vikum áður en hann stofnað Pegida í Dresden.