Gríska þingið mun kjósa um ýmsar félagslegar umbætur á föstudag, sem sumar hverjar eru sagðar ganga gegn skilmálum björgunarpakkans sem Grikkir sömdu um við Alþjóðagjaldeyrissjóðinn, Seðlabanka Evrópu og Evrópusambandið. Frestur grískra stjórnvalda til að óska eftir framlengingu á björgunarpakkanum rennur út sama dag.

„Við munum ekki gefa undan andlegum kúgunum,“ sagði forsætisráðherrann Alexis Tsipras eftir að viðræður í Brussel fóru út um þúfur í gær. Þar hafnaði fjármálaráðherrann gríski samkomulagi sem er háð framlengingu björgunarpakkans, en Grikkir hafa viljað endursemja, ekki endurnýja.

Í ljósi þess hvernig viðræður fóru í gær, þykja líkur auknar á því að Grikkir gangi úr evrusamstarfinu.

Tsipras sagði að Wolfgang Schaeuble, fjármálaráðherra Þýskalands, hefði „tapað ró sinni“ fyrir fundinn í gær, eftir að Schaeuble sagðist finna til með Grikkjum. „Ég vil segja honum, með mikilli virðingu og í vinskap, að hann ætti að finna til með fólki sem gengur með höfuðið beygt,“ sagði Tsipras, og vísaði til þess sem ráðamenn í Aþenu hafa ítrekað sagt; að Grikkir muni ekki beygja sig fyrir þýskri meinlætastefnu.

Tsipras sagði frumvörpin sem tekin verða fyrir á föstudag miða að því að taka á þeirri mannúðarkreppu sem björgunarpakkauppskriftin hefði komið á. „Þetta er sú skuld sem við verðum fyrst að greiða. Við munum ekki bregðast trausti grísku þjóðarinnar,“ sagði hann.

Tengdar fréttir

Grikkland

Ferðamönnum boðið frítt til Grikklands

• Grikkir ganga til kosninga
• Sprengjutilræði í Aþenu
• Efnahagsaðstoð við Grikki lokið
• Ekkert samkomulag um afskriftir

» Fleiri tengdar fréttir

• 1 blogg um fréttina

Bloggað um fréttina

• Wilhelm Emilsson: Samningur eða katastrófa