Þúsundir Ástrala reyndu að berja Harry Bretaprins augum við óperuhúsið í Sydney í dag. Konur voru áberandi í hópnum og einhverjar þeirra voru með borða með áletrunum eins og „His Royal Hotness“ og ein bað prinsinn um að giftast sér.

Harry, sem er þrítugur að aldri, hefur verið að störfum með ástralska hernumí mánuð en hann mun láta af störfum hjá breska hernum í júní.

Aðspurður um litlu frænkuna, Charlotte, dóttur Vilhjálms prins og Katrínar, sagði Harry hana yndislega en Harry hefur enn ekki hitt litlu prinsessuna sem fæddist um síðustu helgi. En nú er dvöl hans að ljúka í Ástralíu, dvöl sem Harry segir að hafa verið stórkostleg. 

Um helgina er för prinsins heitið til Nýja-Sjálands þar sem hann mun dvelja í nokkra daga.