Ellefu afganskir lögreglumenn voru í morgun dæmdir í árs fangelsi fyrir vanrækslu í starfi í tengslum við morðið á Farkundu í Kabúl í mars sl. BBC greinir frá þessu.
Farkhunda, var 28 ára gömul en hún var barin til bana eftir að hafa verið sökuð um að hafa brennt kóraninn, þrátt fyrir að vitni hafi sagt að það væri ekki rétt.
Fyrr í mánuðinum voru fjórir menn dæmdir til dauða fyrir að hafa tekið Farkhundu af lífi án dóms og laga. Þá voru átta dæmdir í sextán ára fangelsi fyrir aðild að morðinu en 18 voru sýknaðir.
Eftir morðið á Farkhunda var meðferð á konum víða mótmælt, meðal annars á Íslandi.
Við réttarhöldin í dag voru átta lögreglumenn sýknaðir af aðild að málinu.
Það var farandsölumaður við Shah-Du-Shamshaira skrínið sem laug því að Farkhunda hefði kveikt í kórarninum en hún hafði sakað hann um að brjóta lög íslams með því að selja lítil bréfsnifsi með trúarlegum textum ("tawiz") undir því yfirskini að textarnir væru kraftmikill galdraseiður.
Æstur múgur safnaðist í kringum þau þann 19. mars sl. barði hana og kveiktu svo í henni við bakka Kabúlárinnar.
Gríðarleg reiði greip um sig meðal margra Afgana vegna ofbeldis sem margar afganskar konur þurfa að þola.
Farandsölumaðurinn er einn þeirra sem var dæmdur til dauða fyrr í mánuðinum. Það er niðurstaða rannsóknardómara að ekkert bendi til þess að Farkhunda hafi kveikt í kórarninum og að ásakanirnar séu uppspuni frá rótum.