„Hnetudrottningin“ Cho Hyun-Ah sem var fangelsuð fyrir að hafa brotið flugöryggisreglur þegar hún reiddist yfir því að fá macadamia hnetur í poka en ekki skál hefur nú verið látin laus.
Cho er dóttir forstjóra Korean Air flugfélagsins, en hún krafðist þess að hætt yrði við flugtak farþegaþotunnar í New York og flugliðanum sem þjónaði henni hent út. Hún var í febrúar dæmd í eins árs fangelsi en áfrýjaði dómnum. Hæstirétturinn komst að því í dag að hún yrði látin laus á skilorði.
Hnetumálið hefur vakið heimsathygli og þykir sýna hroka valdastétta í Suður-Kóreu gagnvart þeim sem eru af lægri þjóðfélagsstigum.
Saksóknarar kröfðust þess að Cho, sem var á þessum tíma í framkvæmdastjórn flugfélagsins, yrði dæmd í þriggja ára fangelsi fyrir að ógna flugöryggi, hindra réttvísina og árás á flugliða.
Atvikið átti sér stað þann 5. desember sl. er flugvél Korean Air var að fara frá New York til Seúl. Cho var um borð í vélinni og krafðist þess að vélinni, sem var að undirbúa flugtak, yrði snúið við að hliðinu svo hægt væri að vísa flugliðanum frá borði.
Dómarinn sagði að Cho hafi hegðað sér eins og um einkaflugvél hennar væri að ræða. Efast megi um hvort hneturnar hafi einu sinni verið bornar fram á rangan hátt. Að sögn dómara hafi Cho ekki einu sinni sýnt næga iðrun vegna framkomu sinnar þrátt fyrir að hún hafi lagt fram nokkur bréf í réttinum þar sem hún lýsir yfir eftirsjá vegna hegðunar sinnar.
Hnetudrottningin á leið í fangelsi
Hnetudrottningin fyrir dómi