Abdullah El-Badri, aðalframkvæmdastjóri OPEC, samtaka olíuframleiðsluríkja, segir að samtökin hafi ekki áform um að draga úr olíuframleiðslu þrátt fyrir verðhrun á olíuverði á undanförnum mánuðum.
„Við hittumst í desember á síðasta ári og í júní á þessu ári. Við ákváðum að halda framleiðlsunni okkar í þrjátíu milljón tunnum á dag, eins og áður. Við erum ekki tilbúin að draga úr framleiðslunni okkar,“ sagði hann við fjölmiðla í dag eftir að hafa fundað með orkumálaráðherra Rússlands í Moskvu.
Olíuverð hefur ekki verið eins lágt í marga mánuði, en óttast er að of mikið framboð af olíu sé á markaðinum.
OPEC og rússnesk stjórnvöld sögðu í sameiginlegri yfirlýsingu eftir fundinn að vísbendingar bentu til þess líklegt væri að meiri jafnvægi kæmist á markaðinn á næsta ári.
Greinendur hafa jafnframt bent á að samkomulagið á milli stórveldanna sex og Írans um kjarnorkuáætlun þess síðarnefnda gæti valdið spennu innan OPEC. Samkomulagið kveður á um að takmarkanir verði settar á kjarnorkuáætlun Írana, þeir dragi úr auðgun úrans og heiti því að koma sér ekki upp kjarnorkuvopnum. Á móti kemur munu stórveldin aflétta viðskiptaþvingunum gagnvart landinu.
Er búist við því að olíuframleiðsla Írans muni stóraukast í kjölfarið sem gæti þrýst niður heimsmarkaðsverði á olíu.
Badri ítrekaði hins vegar að OPEC fagnaði því að viðskiptaþvingunum gagnvart Írönunum verði aflétt. Samtökin gætu ráðið við aukið framboð af olíu.