Þrjátíu nemendur við herskólann West Point í Bandaríkjunum slösuðust þegar hefðbundinn koddaslagur nýnema við skólann 20. ágúst fór úr böndunum. Þar af fengu 24 heilahrising en svo virðist sem einhverjir nemendanna hafi sett harða hluti í kodda sína.
Fram kemur í frétt AFP að einn nemendanna hafi fótbrotnað í koddaslagnum og nokkrir fóru úr axlarlið. Hafin er rannsókn á málinu af hálfu herskólans. Engin áform eru þó um að refsa nemendunum eða hætta við hinn árlega koddaslag. Talsmenn skólans fullyrða að allir nemendur sem slösuðust í slagnum hafi náð sér af meiðslunum.
Löng hefð er fyrir koddaslagnum sem nær aftur til ársins 1897.