Fjölmargir látnir í París
Setja bókamerki
Fjölmargir eru látnir eftir skotárásir og sprengjutilræði í París í kvöld. Skotárásir voru gerðar á að minnsta kosti tveimur eða þremur stöðum og eins sprungu sprengjur skammt frá þjóðarleikvangi Frakka, Stade de France, í úthverfi Parísar, þar sem landsleikur Frakklands og Þýskalands fór fram.
Forseti Frakklands, François Hollande, var á leiknum en yfirgaf leikvanginn í lögreglufylgd til þess að taka þátt í neyðarfundi í innanríkisráðuneytinu.
Nýjustu fregnir herma að fimmtán hafi látist í gíslatöku í Bataclan-tónleikasalnum og þrír í sprengjutilræðunum. Ekki hefur komið fram hversu margir eru látnir allt í allt en gíslatakan er enn í gangi í Bataclan.
Le Parisien segir að þrjátíu séu látnir í árásunum. Skotárásirnar virðast allar vera á svipuðum slóðum í París, í tíunda og ellefta hverfi, og einkum beint gegn fólki á veitingahúsum og börum.
Guardian hefur eftir lögreglu að vitað sé að 26 séu látnir og að gíslatakan sé enn í gangi í Bataclan-salnum.
Franska sjónvarpsstöðin BFMTV segir að um 100 gíslar hafi verið teknir í Bataclan-tónleikasalnum í ellefta hverfi. Samkvæmt frétt BFMTV var um einn klukkutími liðinn af tónleikum bandarísku rokksveitarinnar Eagles of Death Metal þegar árásin hófst þar. Eitthvað er á reiki um fjölda gesta, sumir fjölmiðlar tala um að gestirnir hafi verið um 60 talsins.
Um 40 látnir hið minnsta
Franski blaðamaðurinn Erwan Desplanques hefur eftir vini sínum sem náði að flýja út úr Bataclan-salnum að árásarmennirnir hafi verið fimm eða sex talsins og þeir hafi minnst á Sýrland á meðan árásinni stóð.
Uppfært klukkan 22:48
AP fréttastofan hefur eftir lögreglunni að 11 hafi verið skotnir til bana á veitingastað í tíunda hverfi og 35 séu látnir í Bataclan þar sem gíslatakan stendur enn yfir. Að sögn lögreglu eru um 100 gíslar þar í haldi. Eins létust þrír í sprengjutilræði skammt frá Stade de France-leikvanginum.
David Cameron, forsætisráðherra Bretlands, sendir samúðarkveðjur til frönsku þjóðarinnar og segir í færslu á Twitter að Bretar muni gera allt sem í þeirra valdi stendur til þess að styðja við bakið á Frökkum.
Fólk beðið um að vera ekki á ferli í París
Barack Obama Bandaríkjaforseti segir árásina ekki beinast gegn Frökkum einum heldur allri heimsbyggðinni. Hann er nú að flytja ávarp í Hvíta húsinu og boðar samstarf milli Bandaríkjamanna og Frakka við að hafa uppi á þeim sem bera ábyrgð á hryðjuverkunum sem hafa verið framin í París í kvöld.
Ríkisstjórn Frakklands situr á neyðarfundi og hafa borgaryfirvöld í París beðið íbúa borgarinnar að halda sig innandyra.
Maðurinn sem leitað var að fannst látinn
Hætta vegna jarðfalls í sprungur metin töluverð
Finnar og Svíar taka ekki á móti særðum frá Gasa
Lögreglan leitar eftir myndefni í tengslum við andlátið
Búið að fella björninn
Of margir nemendur og ákall um hæft starfsfólk