Kanada mun aðeins taka á móti fjölskyldum, einstæðum konum eða börnum sem koma sem flóttamenn frá Sýrlandi. Ekki verður aftur á móti tekið á móti einstæðum karlmönnum og vísa yfirvöld til öryggishættu. Áform kanadískra stjórnvalda um að taka á móti 25 þúsund flóttamönnum fyrir árslok hafa eftir árásirnar í Frakklandi verið gagnrýndar og er þessari aðferðafræði ætlað að bregðast við því.
Sendiherra Kanada í Jórdan hefur staðfest að flóttamönnum frá búðum í Jórdan, Líbanon og Tyrklandi verði flogið til Kanada frá og með 1. desember næstkomandi. Mun kostnaður vegna komu flóttamannanna nema um 1,2 milljörðum Kanadadölum.
Faisal Alazem, hjá sýrlenska kanadíska ráðinu í Kanada sem hefur verið í samskiptum við stjórnvöld, sagði í samtali við kanadíska útvarpið að niðurstaðan væri málamiðlun. „Þetta er ekki fullkomnar aðstæður til að vernda varnarlaust fólk, konur, börn og karla líka. En ég tel að það sem gerðist í París hafi verulega breytt kraftinum og viðhorfi almennings,“ sagði hann.
Justin Trudeau var í síðasta mánuði kosinn forsætisráðherra Kanada fyrir frjálslynda. Meðal loforða hans var að taka á móti flóttamönnum frá Sýrlandi og hefur hann látið nokkur ráðuneyti vinna að því verkefni undanfarnar vikur.