Staðfest er að annar tveggja flugmanna sem voru í rússnesku orrustuþotunni, sem skotin var niður af Tyrkjum fyrr í dag, er látinn. Maðurinn var drepinn í fallhlíf sinni á leið til jarðar en báðir flugmenn skutu sér út úr vélinni áður en hún brotlenti.
Fréttaveita AFP greinir frá því að annar flugmanna vélarinnar hafi verið drepinn í skothríð sem barst frá jörðu skömmu eftir að hann skaut sér út úr brennandi flugvél sinni.
„Flugvélin brotlenti innan Sýrlands, fjórum kílómetrum frá landamærunum. Áhöfnin skaut sér út. Samkvæmt bráðabirgðaniðurstöðum lést annar flugmannanna eftir að skotið var á hann frá jörðu,“ hefur AFP eftir Sergei Rudskoi hershöfðingja.
Rússnesk yfirvöld segja að flugvélin hafi ekki rofið lofthelgi Tyrklands líkt og tyrknesk yfirvöld halda fram. Yfirstjórn tyrkneska hersins segir að flugmenn F-16 orrustuvélar hafi skotið flugvélina niður eftir að hafa ítrekað varað flugmenn hennar við því að þeir væru komnir inn í lofthelgi Tyrklands.