Samtök sem berjast gegn múslímum í Bandaríkjunum, Bureau of American Islamic Relations, hafa birt nöfn og heimilisföng fólks sem eru múslímar eða eru „velunnarar múslíma“ á Facebook síðu sinni.
Félagar í samtökunum tóku þátt í mótmælum fyrir utan miðstöð múslíma í Dallas, Texas í síðustu viku, vopnaðir.
Í frétt Guardian kemur fram að skýringin á því að samtökin ákváðu að birta nöfn fólksins og heimilisföng sé vaxandi spenna í norðurhluta Texas vegna árásanna í París 13. nóvember.
Samtökin, sem kalla sig Bureau of American Islamic Relations, skipulögðu mótmæli í úthverfi Dallas, Irving, á laugardaginn. David Wright, talsmaður samtakanna, segir í viðtali við Fox sjónvarpsstöðina að þau mótmæli því að sýrlenskir flóttamenn komi til Bandaríkjanna og eins sé íslamvæðingu Bandaríkjanna mótmælt.
Yfir 50 nöfn eru á listanum og telja margir múslímar í hverfinu að sér sé ógnað. Ekki síst eftir að hverfisstjórinn í Irving, Beth Van Duyne, ýjaði að því að dómstóll sem fylgdi sjaría-lögum væri starfandi í hverfinu.
Alia Salem, framkvæmdastjóri ráðs múslíma í Bandaríkjunum, Council on American-Islamic Relations (CAIR), segir að andrúmsloftið í mótmælunum á laugardag hafi verið mjög ógnandi. Mótmælendur voru vopnaðir Ar-15 rifflum og huldu andlit sín.
Hún segir að frá árásunum í París hafi CAIR fengið fjölmörg hatursskilaboð og henni sjálfi hafi verið hótað í tvígang.
Saur og rifnum blaðsíðum úr kóraninum hafi verið hent að moskunni í Pflugerville, úthverfi Austin.
Samkvæmt upplýsingum frá samtökum múslíma á landsvísu þá hafa ekki borist jafn margar hótanir í garð múslíma í Bandaríkjunum á jafn stuttum tíma og nú frá árásunum í París síðan í kjölfar hryðjuverkanna í Bandaríkjunum 11. september 2001.
Er það meðal annars rakið til íslamhræðslu stjórnmálamanna og forsetaframbjóðenda en margir ríkisstjórar hafa neitað því að taka á mót sýrlenskum flóttamönnum í kjölfar árásanna í París.
Það eru um 200 þúsund múslímar búsettir á Dallas-Fort Worth svæðinu.