Hótar að hætta að aðstoða Úkraínu

Alþjóðagjaldeyrissjóðurinn hefur hótað því að stöðva alla fjárhagsaðstoð til Úkraínu vegna þess hve hægt gengur að berjast gegn spillingu í landinu.

„Ef ekkert nýtt verður lagt fram til umbóta í landinu og til að berjast gegn spillingu, er erfitt að sjá hvernig aðstoð frá AGS getur haldið áfram með góðum árangri,“ sagði Christine Lagarde, framkvæmdastjóri Alþjóðagjaldeyrissjóðsins. 

Vandinn í Úkraínu hefur aukist eftir að Aivaras Abromavicius sagði af sér sem efnahagsráðherra landsins.

„Það er nauðsynlegt að leiðtogar Úkraínu leggi aftur áherslu á umbætur í landinu," sagði Lagarde. 

Ef Alþjóðagjaldeyrissjóðurinn ákveður að hætta fjárhagsaðstoðinni verða þær fjárhæðir sem áttu að renna til Úkraínu á næstu fjórum árum frystar. Heildarupphæðin nemur 17,5 milljörðum dollara en samningur þess efnis var gerður í mars í fyrra.

• Blogga um frétt