Erlent | mbl | 2.4.2016 | 15:34 | Uppfært 16:39

Er brakið úr MH370?

Leitin að farþegaþotunni er sú umfangsmesta sem fram hefur farið. Hún hefur þó enn engum árangri skilað. AFP

Í þriðja sinn á stuttum tíma hefur fundist brak sem talið er að sé úr farþegaþotu Malaysia Airlines, flugi 370, sem hvarf sporlaust í mars árið 2014. Nú rak brak að ströndum eyríkisins Máritíus í Indlandshafi. Um borð í vélinni voru 239 manns.

Brakið fannst á strönd Rodrigues-eyju og voru það tveir ferðamenn sem komu fyrstu auga á það. Þeir tóku það með sér á hótelið, segir starfsmaður þess í samtali við CNN. Nú er það hins vegar í vörslu lögreglunar.

Í júlí á síðasta ári fannst brak á Reunion-eyju, skammt suðvestur af Máritíus. Það var mögulega talið vera úr þotunni. Sömu sögu er að segja um brak sem fannst í Mósambík í febrúar og við strendur Suður-Afríku í mars.

Yfirvöld í Ástralíu og Malasíu vinna saman að rannsókn hvarfsins og hafa ekki staðfest að brakið sem fundist hefur sé úr þotunni. Þau segja það enn til rannsóknar.