Yfirvöld í Norður-Kóreu halda nú fyrsta flokksþing stjórnarflokksins í 36 ár þar sem Kim Jong-un mun að mati sérfræðinga styrkja stjórn sína yfir landinu.

Vel er fylgst með þinginu vegna mögulegra stefnubreytinga eða breytinga innan ríkisstjórnarinnar. Kim er talinn ætla að ítreka kjarnorkuáætlanir sínar á þinginu en því hefur verið haldið fram að þjóðarleiðtoginn muni framkvæma sína fimmtu kjarnorkutilraun á næstunni. Erlendum blaðamönnum hefur verið boðið á staðinn en mega ekki fara inn á flokksþingið.

Götur höfuðborgarinnar Pyongyang hafa verið þrifnar í tilefni þingsins og mátti sjá almenna borgara leggja blóm á torg borgarinnar. Göturnar eru skreyttar með fánum Verkamannaflokksins en á þeim stendur m.a. að leiðtogarnir fyrrverandi Kim Il-sung og Kim Jong-il „verði alltaf með okkur“ og að „höfuðstöðvar kóresku byltingarinnar“ verði verndaðar  „með lífum okkar“.

Þetta er sjö­unda flokksþing Verka­manna­flokks­ins en það fyrsta í 36 ár.  Ekki er mikið vitað um dagskrá  þingsins en að sögn blaðamanns BBC á staðnum er fylgst gaumgæfilega með öllum fulltrúum fjölmiðla. Evens skrifar að Kom Jong-un sé inni á þinginu, umkringdur lífvörðum.

Útlendingar á staðnum tala nú um að það sé hálfgerður uppgangstími í landinu með fjölgun markaða og lítilla búða sem eru nú á hverju horni borgarinnar. Verslun var eitt sinn bönnuð í landinu með öllu eða látnar starfa á laun undir kerfi sem bannaði öll viðskipti.

Í dag stjórna yfirvöld þó ennþá hvað fólk fær að kaupa mikið og að sögn Evans eru það alls 650 grömm af maís, hrísgrjónum og kjöti á dag.

Markmið þingsins sem stendur nú yfir er ekki vitað en sérfræðingar telja líklegt að Kim Jong-un sé að nota tækifærið til þess að lýsa yfir svokallaðri „byongjin“ stefnu sem á að ýta undir efnahagsþróun í landinu og kjarnorkustarfsemi. Á þinginu verður jafnframt kosin ný miðstjórn flokksins.

Vel verður fylgst með hvort að Kim Jong skipi einhverja nýja meðlimi ríkisstjórnarinnar en sérfræðingar telja að nú sé kominn tími á að systir hans, Kim Yo-jong fái einhverskonar stöðuhækkun.

Frétt BBC.